中環出更：林卓廷為撐雷動 擺樹根上枱
政府早前提出禁止喺選舉投票當日或前幾日，公布任何選舉民調或進行票站調查，表面上係避免影響選民嘅真正投票意向，但亦有人認為係針對佔中發起人戴耀廷喺去年立法會選舉時推出嘅「雷動計劃」，杜絕任何黨派利用民調結果教導選民配票，干預選舉。立法會政制事務委員會尋日討論有關問題時，民主黨林卓廷同民建聯張國鈞展開咗一輪舌戰，期間林卓廷仲擺張國鈞嘅黨友前立法會議員鍾樹根上枱，質疑樹根先係雷動計劃嘅始祖。
指控民建聯早知民調為配票
林卓廷指出，鍾樹根曾經喺傳媒訪問中，清清楚楚承認民建聯有進行民調作配票之用，形容有關操作「全行都知」，該黨依家就反過來支持規管選舉民調，「面不紅耳不赤」，「面皮厚過恐龍皮」。
張國鈞否認民建聯曾利用票站調查嘅數據去配票，希望提出指控嘅人拎出真憑實據。佢又話，雷動計劃利用嘅選舉民調，與經登記嘅票站調查有分別，前者冇任何規管，而去年立法會選舉結果，明顯受到票站外嘅調查影響，認為不應任由有關人士繼續干預選舉。
卓妮