中環出更：翡翠王后董吳玲玲 行街買衫喜獲按摩
最近天氣時冷時熱好易病，加上冬季流感高峰期到，真係要小心保重身體。卓妮早前就喺中環一個名店商場見到「翡翠王后」、善德基金會主席董吳玲玲一個人行街買衫，期間仲獲售貨員幫佢按摩隻手，唔知店員係咪想佢買嘢時都可以鬆手啲？
當日大約下晝五點，董太好悠閒咁一個人周圍逛，冇耐就行入去一間時裝店，揀咗一輪之後即試衫，好快就買到心頭好。等緊包裝時，董太喺梳化坐低休息吓，店員即行埋去傾偈。講講吓，店員就捉住董太嘅右手，喺虎口位捽吓捽吓咁。
董太個樣望落好享受，另一位店員趁機攞多幾套衫出嚟畀佢睇，望吓望吓，又好似幾啱，於是董太又起身去試衫，最後掃咗兩套靚衫先離開。
忙到感冒 靠飲陳皮檸蜜
董太拎住戰利品經過附近一間咖啡店時，順手買咗個麵包，但冇即刻食，又再繼續行街。卓妮上前問佢點解咁好心情出嚟行街？董太就話當日放假。至於點解會「買衫送按摩」，佢就慨嘆呢排好忙，又唔夠瞓，搞到患感冒要去睇醫生。時裝店售貨員見佢咁攰，就教佢按虎口穴位，話可以紓緩感冒症狀，冇咁辛苦喎！咁貼心嘅服務，唔怪得董太買衫真係鬆手啲喇！
其實早兩日喺一個晚宴上，卓妮已見董太有啲唔舒服，佢仲攞個私家暖壺沖陳皮檸檬蜜飲，董太話呢樽檸檬蜜係用陳皮、檸檬及蜜糖燉十二個鐘，佢飲後覺得好舒服，喉嚨都鬆啲。佢笑笑口話呢排多活動，全靠呢樽檸蜜撐住咁話。
卓妮