政情：老將打不死 基礎教育冇碇企
新一屆三十六名港區全國人大代表名單出爐，有人歡喜有人愁，最令人意外嘅係退休中學校長、教聯會會長黃均瑜未能從連任四屆港區人大嘅楊耀忠手上接棒，令教聯會自九七回歸以來首次冇代表當選港區人大，連同風采中學校長何漢權亦無緣出線，標誌涉及香港中小學嘅基礎教育一環，於國家最高權力機關歷史性「缺位」。有分析指呢個政治格局係同三十六名當選人中排名「尾三」當選嘅前立法會議員蔡素玉，以及末席當選嘅資深港區人大王敏剛於選情告急下「打不死」有關。
中央官員最近半年談及香港問題，最多涉及維護國家安全嘅法律缺位影響有目共睹，其次就係推動港人人心回歸，當中國家教育部長陳寶生更暗批港府於回歸後推行國教不力，凡此種種均被視為重要信號，就係擁有法律及教育背景嘅候選人喺今次人大選舉有望看高一線，惟最終結果卻不似預期。
黃均瑜差約百票 僅列遞補名單
首先同樣擁有法律背景，首次參選嘅香港中小型律師行協會創會會長陳曼琪，以及剛加入自由黨的律師陳曉峰，當中只有陳曼琪以超過一千四百票當選，至於陳曉峰只取得一千一百八十六票，排名第三十七剛剛未能入圍。
至於四名打正旗號以教育界名義出戰的候選人，即黃均瑜、何漢權、科技大學副校長朱葉玉如及角逐連任的公開大學校長黃玉山，最終只有代表高等教育界嘅朱葉玉如及黃玉山當選，黃均瑜及何漢權二人分別取得一千一百七十九票及近一千票落選，其中黃均瑜與末席當選嘅王敏剛僅相差約一百票，最終只可以列入遞補名單。
背後路線受挫 政界中人倡補償
對於黃均瑜等人「被擠走」嘅原因，有資深親中人士透露，選前已盛傳有多於一名現任人大會落敗，除咗不獲所屬中華出入口商會祝福嘅愛國歌手張明敏外，另一上榜名字則眾說紛紜，其中一個於政圈熱傳係祖籍福建嘅東區區議員蔡素玉，據知蔡於選前一、兩日亦得悉自己於多張親中名單榜上無名，急急尋找友好四出「救亡」，結果以近一千三百票，於三十六名當選人排名「尾三」當選。最終取得一千二百七十五票末席當選嘅王敏剛，據知得票率與五年前相比明顯下滑，有指同佢早前身體抱恙較少現身拉票活動，以及唔少政界中人誤會佢今次係退下火線有關。就喺蔡素玉及王敏剛「打不死」下，黃均瑜、何漢權代表嘅基礎教育板塊無緣出線，有指呢個結果係對黃、何等旗幟鮮明撐國教嘅愛國愛港團體大旗手，背後代表嘅理念路線一次重大挫敗。
據報有政界中人已私下向有關方面建議，應對黃均瑜等人背後代表嘅路線給予「補償」，包括考慮於明年初委任新一屆全國政協委員時，尋找同黃均瑜等人路線相近嘅人士入局，最終呢一幕會否發生，肯定會引起政圈更多解讀同聯想。