政情：公民講場：紀文鳳寄語年輕人 搞事前諗諗

去年一月發生嘅衝擊港大校委會事件，示威學生一度圍堵載住校委紀文鳳嘅救護車，阻撓對方送院接受治療。不過到案件審訊時，紀文鳳亦有寫信為涉事學生求情，兩名被告馮敬恩同李峰琦最後被輕判社會服務令，毋須收監。紀文鳳尋日喺電台表示，寫求情書時佢其實有猶豫，但最後認為應該畀對方改過機會。佢寄語年輕人日後做事要「停一停，想一想」，要合理、合情同合法，但唔知係咪本港所有嘅年輕人都聽得入耳呢？