政情：馮煒光想做官
南區區議員馮煒光去年因為應徵副局長一事同白鴿黨鬧翻，之後仲索性退黨專心應付副局長面試，但政府至今都無再聯絡佢，意味求職失敗告終。事隔一年，佢近日忽然表明無意連任下屆區議員，希望可以專心從事佢嘅文化公關工作。不過，距離下屆區議會選舉仲有兩年時間，點解佢要咁早講定唔選區議員呢？莫非近日佢見到特首辦宣布委任商務及經濟發展局副局長人選，因而重燃佢做官嘅心志？
曾應徵副民政局長衰咗
三名政治助理喺兩個月內先後跳船，對政府管治帶來沉重打擊，唔知政府係咪想話畀人聽仲有好多人願意加入熱廚房，於是喺上周二宣布委任梁敬國出任商務及經濟發展局副局長。梁敬國話自己喺去年政府公開招聘副局長及政助時遞表應徵，事隔一年多後先獲聘任。現時仲有勞工及福利局同發展局未搵到副局長，如果按梁敬國嘅例子嚟睇，去年第一批申請做副局長嘅人可能仲有入職機會。
我哋問過首批有份應徵嘅馮煒光，佢話自己當時應徵民政事務局同文化局副局長，前者最後就搵咗許曉暉出任，而文化局就因為新政府架構重組過唔到立法會一關而宣布流產。佢話，雖然政府依家仲有兩個副局長空缺，但政府自去年面試後一直無搵過佢，相信自己已經落選，又話由於佢對餘下兩個政策局負責嘅議題唔係好熟悉，所以都唔會再主動申請。佢之後話，依家唔入官場，齋做個區議員都幾寫意。
提早兩年講定唔想連任
不過，馮煒光話鋒一轉，又自稱已經出任南區區議員接近五年，透露下屆無意再參選，又話依家正積極游說白鴿黨某位新生代接棒，希望對方可以區議員做踏腳石，一年後參選立法會。就咁聽馮煒光嘅說話，表面上似乎對從政意興闌珊，但有人就估計，即使佢唔想連任區議員，都唔使提早兩年咁早講定，莫非佢有意謀定後路，看準依家政府欠缺人才，望以博得政府委任一官半職？唔知政治助理職位佢又殺唔殺呢？