政情：泛民戰補選 怕DQ驚趕客 唔提自決公投
立法會四個議席空缺將於明年三月十一日進行補選，民主派正為此進行初選冀四席全勝，重奪地區直選議席過半數議席嘅控制權，之不過近日卻橫生枝節，註冊社工呂智恆提出於今次補選加入自決公投元素，包括把公投議題變成民主派代表嘅參選政綱，令補選成為一次變相公投。不過，公投字眼一出，民主派內各個政團即時切割，冷待有關言論試圖降溫，部分有意落場嘅參選人連帶自決都盡量唔提，由此觀之，民主派唔敢提自決公投，似乎係擔心有機會遭取消參選資格（DQ）兼「趕客」，本土自決旗幟風光不再，真係時也命也嘞！
民主派嘅九龍西及新界東初選正在進行，六名已報名參加初選嘅民主派正密密爭取曝光增加人氣，就喺呢個關鍵時刻，去年曾參加立法會新界西直選但落敗嘅呂智恆，突然於近期成立嘅「修改立法會議事規則關注組」提議設定公投議題，成為出戰港島、九西同新東補選嘅民主派代表政綱，再喺冇補選嘅九龍東同新界西搞民間投票，藉此將嚟緊嘅補選變成一次對議題嘅公投。
朱凱廸撲火 唔撐搞公投
呂智恆有關言論一出，去年大打自決旗幟成為新西「票王」嘅朱凱廸不但未有支持，更立刻撲火，話明年補選唔係搞公投嘅合適事件，試圖為公投言論降溫。
有已報名民主派初選嘅參選人批評，呂智恆當日講自決公投係「爆肚」，又以七年前由公民黨同社民連合作搞嘅五區請辭觸發嘅變相公投為例，稱當年投票率唔夠兩成，反映市民對此唔多接受；另一名民主派初選參選人亦話，今時今日嘅政治環境搞公投有好大風險，單係自決兩隻字就有機會畀政府視為支持港獨，連參選資格都被取消，形容此舉係「風險大、回報低」。
張秀賢「洗底」 否認係本土
除咗擔心遭DQ外，民主派唔敢開腔講自決公投嘅另一原因，係本土自決派嘅號召力已大不如前，其中顯例係已報名參加民主派新東初選嘅中大學生會前會長張秀賢公開「洗底」，否認自己係本土派同支持港獨主張，為咗於初選脫穎而出真係搏到盡。
另一方面，據報另外兩名初選參選人，分別係自決派嘅建築界前議員姚松炎，以及新民主同盟范國威也疑似劃清界線，對於有關公投建議避而不答，據悉姚松炎近日更離開咗「修改立法會議事規則關注組」，由此可見，公投兩個字已令民主派中人成為驚弓之鳥，講到底都係唔想惹禍上身。