中環出更：羅致光網誌暗批邵家臻唔睇文件
立法會議員不時對政府唔同政策狠批至體無完膚，勞工及福利局局長羅致光於最新網誌不點名批評兩名身兼社工嘅立法會議員，分別於討論兩項勞福課題時唔睇文件，錯過部分內容，其中疑似被批評嘅社福界議員邵家臻認為今次事件屬於口舌之爭，反批評羅致光此舉旨在轉移視線。
羅致光尋日發表最新網誌，首先提及港人真係好忙，冇時間睇文件，更冇時間睇長嘅報告，佢其後筆鋒一轉，不點名批評「一位社工立法會議員」，於施政報告致謝辯論談及資助長者聘請外傭建議時，聲稱「這點我們完全沒有討論過」，更將之形容為「石破天驚」，羅致光反駁，其實有關方案建議係市民於諮詢過程中提出，經研究顧問歸納後並獲相關委員會接納。
羅致光其後再不點名「開火」，話最近一次福利事務委員會，討論指定暫託宿位設立實時空缺查詢系統嘅可能性時，當時有「另一位社工立法會議員聽到官員」提及以上課題時，稱呢個可能係今日唯一嘅好消息，恍如第一次聽到一樣。
就此，羅認為既然佢哋如此關心有關方案嘅內容，一定從頭到尾小心察閱，點會錯過有關部分內容，佢之後更反問究竟仲有幾多方案嘅建議，佢哋係唔知嘅呢？
邵駁斥轉移視線
眾所周知，立法會內建制、民主派都有多名有社工背景嘅議員，雖然羅致光冇點名批評，但外界都心中有數。身兼社工嘅工黨議員張超雄承認曾經講過資助長者聘請外傭建議係「石破天驚」，但佢重申，自己嘅意思係批評政府冇交代過建議嘅規模，唔係話自己冇聽過；邵家臻則形容，今次事件屬於口舌之爭，反批評羅致光唔應該執着有關建議係由邊個提出。
卓妮