政情：慢必邀屋企過夜 周庭話願意
剛年滿二十一歲合乎參選立法會資格嘅眾志常委周庭，表明積極考慮參選明年三月嘅立法會補選，填補該黨主席羅冠聰於半年前喪失嘅香港島議席空缺，周庭尋日喺羅冠聰陪同下於太古擺設街站，獲得一眾泛民現身撐場，其中首名「出櫃」議員、家住北角嘅「慢必」陳志全話，願意將屋企變成周庭未來嘅選舉分部，更揚言就算過夜都冇問題，周庭表明願意赴會，反問點解唔敢上去喎。
周庭棄英籍處理中
慢必之後提及，其實屋企有兩隻貓，只要唔驚就得，並揚言「上嚟就算同床都唔怕」，周庭緊接「表明心迹」，話自己係好鍾意貓，相反喺隔籬聽到呢段對話嘅立法會議員許智峯稱，「如果係我就怕喇」，對此，慢必就笑而不語嘞。
另外，周庭被問及一旦遭取消參選人資格（DQ）有否後續計劃，周庭稱目前難以估計政府會出咩招DQ佢哋，自己目前傾向簽署確認書，又提及放棄英國國籍一事正在處理中，相信會好快獲得有關方面回覆。