每個模特兒都天生麗質，擁有火辣身材，除咗呢啲外在條件，內在美可唔可以後天培養出嚟呢？南韓人氣Model李美晶就話畀大家知，先天條件固然重要，但係後天培養亦唔少得，而佢正係最佳例子。
喺南韓京畿道軍浦市出生嘅李美晶，入行理由好簡單，皆因佢自小夢想成為模特兒。不過，當佢同人講呢個夢想嘅時候，唔少人都覺得佢不切實際，因為當其時佢未發育，身高唔算太高，樣貌亦只屬一般。對於他人嘅批評，佢並唔介意，反而令佢更加有決心達成夢想。隨住成長，佢變得身材高挑，上圍亦發育良好，35吋咪咪分量十足，認真吸睛。不過單憑外形絕對唔足以令佢喺競爭激烈嘅模特兒界立足，為咗裝備自己，李美晶選擇入讀大慶大學嘅模特兒系，須知道呢間大學嘅模特兒系喺南韓相當有名，學系中嘅學生不但個個都係型男索女，更係培養模特兒同藝人嘅頂尖搖籃。然而，同細個時嘅經歷一樣，當佢話修讀模特兒系嘅時候，唔少人都唔睇好佢，結果當然係佢成功入讀模特兒系，令嗰啲唔睇好佢嘅人大跌眼鏡啦！同唔少模特兒一樣，佢喺在學時期已經兼職做攝影模特兒，憑住出眾嘅外形，加上接受過專業嘅訓練，相對唔少新進模特兒，甚至比有一兩年經驗嘅模特兒嚟講，佢嘅表現更加出色，因而備受注目。
2010年畢業後，李美晶便全心全意投入職業模特兒事業之中。正所謂「一個好嘅開始係成功嘅一半」，早喺攝影模特兒界擁有相當人氣嘅佢，甫出道便獲得唔少模特兒事務所向佢招手，而佢亦好快揀選咗心儀嘅事務所簽約，之後事務所安排佢以Show Girl身份喺電玩展站台，佢解釋事務所有呢個決定，係因為覺得佢已經喺攝影模特兒界有相當經驗，所以好放心佢喺大型展銷活動中登場。而佢憑住甜美可人嘅樣貌同火辣身材，加上性感嘅制服，成功吸引大家嘅目光，成為人氣Show Girl之一。
有見及此，事務所安排佢參加超級模特兒綜合競賽，呢個安排對某啲人嚟講，可能係個頗為急進嘅決定，事關佢出道都未夠半年，點可能咁快可以面對如此大型嘅模特兒選美賽事呢？如果咁諗嘅話，未免太睇小李美晶喇！因為早喺佢在學時期，便已參與過唔少呢類競賽活動，而多年嚟嘅儀態及肢體訓練，賦予佢足夠嘅信心，結果佢獲得最受廠商歡迎模特兒大獎。獲獎固然感到開心，但係對佢嚟講更重要嘅係未來可以獲得更好嘅成績。事實上，喺佢獲獎之後，工作量大增，活動範圍更推廣至賽車女郎及車模界，不但可以喺各項南韓舉辦嘅賽車賽事上見到佢嘅身影，同時佢又頻頻喺各大車展上登場。時至今日，佢已經係位極具人氣，號稱樣貌、身材同氣質兼備嘅模特兒。
簡介：擁有甜美嘅樣貌同魔鬼身材，固然係李美晶成功嘅重要條件，但係佢認為後天嘅培養同樣重要，佢表示如果唔係因為經過大學時嘅訓練，真係冇信心可以喺模特兒界立足。如果大家想了解佢多啲嘅話，就要Click入呢個網站喇！
網址：http://cafe.daum.net/0805mijung
出生地：京畿道軍浦市
身高：167cm
三圍：35、25、35
撰文：魂