中環出更：單日堅無蟹不歡太太敏感都陪食
講起蟹，呢排最多人議論嘅當然係大閘蟹，尋日喺馬場見到懲教署前署長單日堅，原來佢係蟹癡，直頭係無蟹不歡添！乜嘢品種嘅蟹都鍾意食，總之係蟹就得。單太亦同卓妮講，因為單日堅無蟹不歡，所以佢一返屋企食飯，其中一道餸菜一定係蟹。另外，單太仲透露，話自己其實對蟹有少少敏感，但因為老公鍾意食，所以佢都會投其所好陪吓老公食，果然係個廿四孝老婆。
雖然身為蟹癡嘅單日堅話乜嘢品種嘅蟹都鍾意食，但佢最鍾意食嘅就係蒸蟹，覺得就咁用個鍋蒸嚟食，係會食到蟹嘅鮮味，而依種煮法亦都係單太最常煮嘅。一向用清蒸方法煮食都係較為健康，同時可以滿足食蟹嘅意欲之餘，又可以食得健康，一舉兩得！
適逢依家係大閘蟹最當造嘅季節。單日堅就話每年都會趁住依個季節，用大閘蟹依個誘因，大條道理咁約埋班老友一齊出嚟食蟹，乘機敍吓舊。
史立德對港檢驗有信心
講起內地大閘蟹因批文問題，只係有小量入口香港，而台灣大閘蟹又驗出二噁英超標，搞到人心惶惶。同為蟹迷嘅中華廠商聯合會副會長史立德就話以往每年都會食大閘蟹，仲會請朋友食，不過依家搞到咁嘅情況，連佢都冇乜點食喇！話雖如此，但係史立德就對香港嘅檢驗方法好有信心，仲話食少一兩年都冇問題，最緊要係供應商可以做好啲品質。
新界鄉議局主席兼立法會議員劉業強就話早幾日都有同朋友一齊食大閘蟹，但由於香港最近要再驗蟹，一眾蟹迷應該仲要等多排，佢就希望香港可以盡快加緊檢查，等蟹迷都可以盡快有靚蟹歎喇！
卓妮