政情：羅永聰開顧問公司搵真銀
多名未有過渡嘅前政府官員陸續獲批「再就業」。政府尋日公布，財政司前政治助理羅永聰獲批開設兩間顧問公司。羅永聰早前在特首選舉中，為前財政司司長曾俊華助選，一度備受好評，選舉過後，佢嘅去向一直成謎，結果佢選擇自行開設公司「搵真銀」。
同時出任董事
前任行政長官及政治委任官員離職後工作諮詢委員會尋日公布，羅永聰所開設嘅兩間顧問公司，其中一間係同其他股東聯名開設，名為「蘇杭街一號（香港）有限公司」，而另一間則暫時未有名稱。
除了身為創辦人，羅永聰亦出任兩間公司嘅董事。根據文件顯示，佢間公司將提供公關和顧問服務，而且將於下周一（23日）開始上班。委員會亦向羅永聰建議唔應該競投與財政司司長辦公室、發展局、商務及經濟發展局等相關政府部門負責嘅合約，亦不應參與有關政府事宜嘅游說工作，同埋不應就其客戶與政府嘅往來提供任何顧問服務等。