發展局局長黃偉綸尋日喺電台節目上認叻，聲稱已搵到二百一十幅土地，其中廿六幅係近期搵到嘅。佢話透過改變呢二百一十幅土地嘅規劃，喺「數學」上可以滿足土地供應，提供三十萬個單位，但實際進度要視乎喺城市規劃委員會討論時是否順利，否則就會影響五、六年後嘅供應云云。講咗咁多，等於冇講，香港公屋輪候問題愈拖愈急，最大嘅難題係可以即刻動工興建、冇阻滯嘅土地唔易搵，如果只係求其搵地湊數，當係數學題咁做，小學生都識喇！
