中環出更：百日咳針難撲 容海恩促健康院入貨
孕婦想BB身體健康，真係費盡心思。依家懷有第二胎嘅立法會議員容海恩（Eunice），近日睇私家醫生時，被醫生問及使唔使接種百日咳疫苗時，發現原來並非度度有貨，覺得既然衞生防護中心都建議孕婦要打，促請食物及衞生局要令到母嬰健康院有得打，咁先方便到一眾孕婦。
Eunice話，近日發現，原來醫生要入百日咳疫苗嘅貨都唔容易，唔係個個都有貨，如果疫情爆發，應該要確保孕婦可以好方便咁接種到。因為最好喺懷孕三十五周前就要接種，有時間限制，最好就喺公立醫院同健康院有得打，咁就最方便，唔使孕婦要周圍搵邊度有得預約。
孕婦支援唔太夠
佢又覺得，依家對孕婦嘅支援真係唔太足夠，舉例指結構性超聲波可以睇到胎兒係咪健全，但依家喺唔少公立醫院都要高危、高齡孕婦至可以做。其實政府應該令全部孕婦都有得照，亦都應該規定全部孕婦都要照，一個唔好彩，發現胎兒有咩事時，都可以早啲決定日後嘅照顧方向，覺得政府真係好應該增加呢方面嘅資源。
卓妮