玩「笨豬跳」、跳傘一類高危活動，好多時參與者都要簽定生死狀，最近某大學O camp居然都搞呢一套，唔通迎新營都係「高危活動」？
睇真啲呢份「生死狀」，簡直嚇死人，當中講到明簽署嘅學生清楚了解因參加迎新營而造成嘅人身傷害、財物損失或不當身故嘅所有責任及義務，大學學生會同學系方面唔會承擔任何法律責任云云。唔怪得有學生質疑舉辦迎新營嘅學生會有意逃避法律責任喇！
不如聽吓法律界人士點講。原來免責聲明並唔能夠免除活動主辦單位所有責任，一旦學生喺活動中受傷、有財物損失等，而能證明主辦單位有疏忽，又或者未提供足夠安全措施，參加學生仍然有法律權利追究咁話。
不過點講都好喇，參加大學迎新活動，都係想了解校園文化，同未來同學仔加深了解，冇理由搞到好似要搵命博咁啩。可惜吖，現實中嘅大學迎新活動，又真係危機四伏，試過有大學宿舍焗班新鮮人長跑十公里，外加一系列地獄式體能訓練，結果爭啲搞出人命。
至於迎新活動之後嘅「上莊」，同樣係亂象多多，好似今次涉事院校咁，就試過有學生喺校園內進行宣傳活動，同競爭對手打大交而鬧上法庭，結果畀個官揶揄佢哋喺咪讀武術科！
大家有眼睇，近年所謂嘅「O camp文化」早就變質變味，唔少活動色情當豪邁，鹹濕當奔放，令人不欲觀之。喺校園內玩happy corner、人形毛毛蟲都嫌未夠喉，近年甚至發展到公然喺公共交通工具上演舔女同學大髀嘅真人AV騷，睇見都眼冤；至於大學宿舍接連發生嘅欺凌甚至性虐醜聞，更加係沒有最賤，只有更賤。
即係咁，年輕人天生貪玩，只要唔犯法，唔嚴重影響他人就無可厚非，問題係成個大學生活四年流流長，除咗玩都應該靜落嚟做吓學問，學吓做人道理。只可惜今時今日香港愈來愈政治化，寧靜象牙塔早就一去不復返，某啲所謂教授鼓吹「違法達義」，煽動學生有書唔讀一味搞政治，有人佔領街頭，有人參與暴動，結果就係監都有得坐。特別係嗰班學生領袖，被有心人吹捧到忘乎所以，搞亂社會，自毀前程，仲以為自己「為生民立命」，係七百萬港人英雄，可笑復可悲。
港大校委會主席李國章最近話，港大近十年排名不斷下跌令佢感到痛心，道出唔少市民心聲。查實成個香港嘅大學教育被政治騎劫，墮落嘅又何止港大？古人話，「少年智則國智」，年輕人走歪路，香港都唔使旨意有運行。