政情：活用鮮花入饌 龔嬿不負其名
近年出現好多花香味嘅甜品同美食，尤其踏入夏天，喺食品上面加上花嚟做點綴，增加夏日氣息之餘，賣相都分外吸引。早前我哋見到「鮮花公主」龔嬿（Yvonne），原來佢除咗做鮮花裝飾生意同出身珠寶世家外，現時亦有經營時裝同海產生意。就咁睇，表面上四樣嘢好似南轅北轍，但其實息息相關，好似佢喺鮮花呢方面嘅知識，用喺食日本刺身或蟹嘅時候，就可以應用到兼發揮特別作用喇！
講起現時好多食肆嘅食物都興加入花嚟增強風味，做咗咁多年鮮花相關工作嘅Yvonne對花就夠晒熟悉。佢話現時荷蘭、歐洲、新西蘭同日本等地都有食用花，舉例食日本嘢例如鱈場蟹或者刺身時，我哋見到鋪喺上面或者撈埋啲蟹肉一齊上嘅花，其實就係「花穗」同「小菊」，呢兩種花原來仲可以用嚟放喺豉油入面，由於部分刺身相對淡味，食嘅時候蘸一下放有花瓣嘅豉油，就會聞到陣陣清新花香，聽落夠晒浪漫。