政情：陳凱欣護高永文同陳沛然Fb開拖

政助鬧刪留言 議員貼紀錄反擊

陳沛然日前就《醫療人力規劃和專業發展策略檢討報告》，喺立法會衞生事務委員會上要求高永文交代有關資料，當時高永文話會後提供。陳沛然事後將自己嘅提問放上Fb，並貼文指「都是我的錯，問題太尖銳，要自我檢討，講完。」不過，呢番言論卻引起陳凱欣不滿，甚至留言指「會議超過一小時，片段只有三分鐘，你喜歡怎樣形容也可以」、「利用別人不熟議會過程，只看三分鐘片段，就判斷高局長不回應，確實不太公允」、「如果高局長不能滿足你，那希望下任局長能令你滿足一點」等等。

事隔幾分鐘後，陳凱欣再次留言「只准自己批評，而不接受別人批評，我倒看不到這是君子行為」，懷疑陳沛然刪除佢嘅留言。陳沛然隨即反擊，貼上自己Fb嘅紀錄，指自己冇刪除留言，更指Fb認為係濫發留言（spam）先被隱藏留言。陳沛然其後見到網友不斷留言指摘陳凱欣，都有叫朋友「高抬貴手」，話自己認識陳凱欣幾年，工作認真，只係各為其主。

將會告別政府，重回私人執業嘅高永文，尋日喺傳媒茶敍時亦不忘大讚陳凱欣，話好開心搵到陳凱欣幫手，指對方同立法會議員、區議員同各持份者都能做好溝通工作，當「夜麻麻」有人要搵自己，陳凱欣都幫手擋住，絕少驚動到佢同陳肇始，大讚陳凱欣能夠加強政治敏銳度，仲幫手做好議會游說工作。

高永文亦話同陳肇始多年來二人互相配合，對方獲委任做局長，佢都好開心，交接亦好順利，深信陳肇始未來能做好工作，自己唔喺政府都會繼續支持。副局政助都獲高永文大讚，唔知道兩位陳小姐，來屆仲可唔可以再合作呢？