中環出更：黎棟國決裸退 白韞六焗留廉署執手尾
候任特首林鄭月娥籌組新班子嘅工作，再次遇到災難性重挫。早前盛傳經驗老到、並深得中央信任嘅現任保安局局長黎棟國，將於七一後減薪轉任廉政專員，以便（目及）住近年是非多多嘅廉政公署。但最新消息係，現年已六十五歲嘅黎棟國，除咗年紀大之外仲面對「三高」問題，經過深思熟慮後，最終都係以健康理由婉拒有關邀請，鐵定喺七一後裸退。
白任內表現一般 掀爭議事件
黎棟國唔做，其他可能人選又未夠班之下，據聞本已決定退休嘅現任廉政專員白韞六，又會好似律政司司長袁國強咁再坐一會，直至林鄭搵到合適繼任人先離開。另一說法係白韞六任內有唔少蘇州屎留低，包括告或唔告都會有排煩嘅UGL案，有關方面希望白韞六執埋啲手尾先好走人，以免連累下手一上場就孭黑鑊。
不過，白韞六任內嘅表現只屬一般，包括鬧出前署理執行處首長李寶蘭及多名高層劈炮唔撈事件，民主派曾多次要求佢問責辭職。喺建制派方面，亦有人不滿廉署放生多名被指「收黑金」嘅泛民人士，對愛國愛港人士則手起刀落。估計今次白韞六留任，喺廉署內外都會引起頗大反彈，令林鄭更加頭痕。
卓妮