中環出更：潮人成人禮出花園重現香港
講起成人禮，好多人都會諗起日本青年男女衣着端莊咁參與成人禮嘅景象。其實中國亦有成人禮，好似潮州人就有名為「出花園」嘅成人禮。香港潮屬社團總會主席陳幼南、會董胡炎松等人尋日齊現身為今年底喺香港重現「出花園」習俗嘅活動搞宣傳騷。不過經歷過「出花園」嘅潮人好少，胡炎松係少數之一，佢就現身說法，憶述當年朝早沐浴更衣、拜神祭祖，然後按長輩指示走出花園嘅「出花園」過程。
胡炎松話，過往農業社會有「十五成丁，十六成人」之說，虛齡十五嘅少年就要離開好似花園咁舒適嘅家庭，獨立謀生。
胡炎松行禮後「一切如舊」
當年佢都行過成人禮，除咗行出花園之外，祭品方面都好得意，例如紅桃粿同發粿，取其諧音寓意鴻圖與發財；又要咬雞頭以示獨佔鰲頭，再啖雞尾寓意好頭好尾。仲有豬肝、豬心，以示做人要有心肝，不忘本。此外，又唔可以隨意講「唔知」同「唔得」，因為等於將責任推畀父母或否定自己。
胡炎松笑稱，「出花園」當日自己儼如主角，佢仲以為從此可躋身家庭核心，掌話事權，點知儀式過後一切如舊喎！潮州商會青委龔雅璇就話，時下小朋友受盡寵愛呵護，好多青少年都太自我，覺得朋友與網絡世界比父母更重要，所以好值得提倡成人禮。
潮屬社會總會青委主席張俊勇、副主席馬清揚及足球員陳思駿都有到場。張俊勇話，「出花園」嘅各項儀式將於年底潮州節重現，屆時歡迎十四至十五歲少年參與。
卓妮