中環出更：笑言唔識煮餸 楊立門唔入「熱廚房」
有「AO歌王」之稱嘅民政事務局前常任秘書長楊立門（Raymond），將會喺五月八日出任香港中華廠商聯合會行政總裁，佢尋日出席一個電台午宴活動時，被問到新一屆政府有冇邀請佢返熱廚房時，佢就笑言廚房咁熱，自己又唔識煮嘢，點會入廚房喎。言下之意，即係唔會重返官場喇！
Raymond直言喺退休之後，確有唔少公司向佢招手，但佢最終都係心儀廠商會，除咗因為自己喺政府時都做過同工商界有關嘅職位外，佢同廠商會會長李秀恒亦相識咗好耐。
咁又有冇意見畀新一代AO？佢就侃侃而談，話做得AO都諗清諗楚o架啦，雖然社會地位冇以前咁天之驕子，但起薪點都係有一定吸引力嘅。
做主持訪問20位傑出人士
除咗唱歌了得，Raymond早前幫電台拍咗一輯訪談節目，一嘗做主持人滋味，訪問二十位唔同界別嘅兩代傑出人士。見佢旁白腔調好專業，咬字好認真，原來當年高山劇場新翼落成，佢幫手錄咗段中英文同國語版本嘅入場前廣播，沿用至今。廿幾年前仲曾拍過立法會議員葉劉淑儀一齊做即時傳譯，話可以搵外快又幾過癮喎。
卓妮