中環出更：小吉放鬧鐘提同事護眼
眼睛係靈魂之窗，重要之餘又脆弱，一定要好好保護。卓妮尋日見到健康快車創會主席方黃吉雯（小吉），記得佢好多年前係以大眼鏡示人，依家就唔使戴眼鏡，雙目有神，除咗係因為做過激光矯視唔需要再做四眼妹之餘，佢仲好注重雙眼休息，話喺公司有個鬧鐘，專門用嚟提醒大家要畀雙眼「放break」喎。
小吉尋日出席健康快車廿載光明行發布會，簡介除為白內障患者施手術外，亦將於五月同六月喺兩個商場為預先登記嘅市民進行糖網病眼底篩查，希望更多人關注糖網病並及早發現。
馬時亨張怡寧即場驗眼
講起雙眼健康，原來小吉以前都有近視，廿幾年前做過激光矯視後，一直到依家都冇再反彈。不過佢話用得電話同電腦多，有時對眼都會痛，咁就一定要即刻停低休息。而佢哋做咗白內障工作咁多年，亦好關心身邊同事嘅雙眼健康，所以佢之前就買咗個鬧鐘放喺公司，每小時自動響一次，提醒大家一聽到鬧鐘響就要企起身郁動吓，畀雙眼休息，因為有時做嘢太忙，真係會連休息都唔記得o架！
基金副主席馬時亨（肥亨）同國寶級乒乓球奧運冠軍張怡寧亦有現身。馬時亨透露母親喺好年輕嘅時候就已經有白內障，當時醫療仲未有依家咁發達，要去公立醫院等好耐先有得睇，所以佢依家都好緊張自己對眼。現場可以進行糖網病眼底篩查，佢哋仲即場檢驗埋添！
香港大學李嘉誠醫學院眼科學系臨床副教授王逸軒同臨床助理教授陳焯鴻就補充，糖尿病引發嘅糖網病好常見，係嚴重嘅糖尿病併發症，亦係主要致盲眼病之一，而糖網病好大程度上是不可逆轉嘅，因此要及早發現，先至可以避免喪失視力。
卓妮