政情：撐鬍鬚曾民主阿婆漢奸黎蛇鼠一窩
特首選舉落敗人、前財政司司長曾俊華（鬍鬚曾）於特首選舉期間多次畀「搞事四人幫」吹捧，先有「民主阿婆」前政務司司長陳方安生，舊年底公開指鬍鬚曾較能捍衞港人核心價值，其後壹傳媒黎智英（漢奸黎）多次透過旗下報章撰文力撐鬍鬚曾，最新曝光嘅選舉開支申報資料有單有據，顯示民主阿婆直接向鬍鬚曾捐款五千元，加上鬍鬚曾年初被發現同漢奸黎親友李實文密會三小時，究竟三人錯綜複雜嘅關係，係咪印證眾人蛇鼠一窩，答案可謂呼之欲出。
選舉眾籌共收1500萬捐款
特首選舉落幕約一個月，三名候選人嘅選舉開支曝光，包括捐贈人同金額，其中曾發起眾籌嘅鬍鬚曾合共有一千五百多萬元選舉捐贈，如以個人捐款計算，最大筆係來自前行政會議成員楊敏德同立法會前議員詹培忠，各自捐出二十五萬元，而香港電視網絡主席王維基捐出二十萬元，前行會成員葉維義及太太分別捐出十萬元，有份提名鬍鬚曾嘅地產商合和董事總經理胡文新也捐出十萬元，自由黨榮譽主席田北俊亦透過旗下嘅公司捐出六十多萬元。
不過要數最耐人尋味嘅係一筆捐款，係民主阿婆以英文名「Anson Chan」向鬍鬚曾捐出五千元，雖然齋睇金額唔算多，五位數字都未到，但捐款向來被視為政治表態，如果唔支持某人或某個政黨政團，根本連一毫子都唔會捐出。
民主阿婆向來被指有到外國「唱衰香港」呢鋪癮，今次明碼實價捐款支持鬍鬚曾，認真耐人尋味。眾所周知，民主阿婆同漢奸黎同為「搞事四人幫」成員，早年又有密件踢爆民主阿婆曾接受來自漢奸黎嘅三百萬元捐款。
漢奸黎親友為鬍鬚曾徒弟
另一方面，漢奸黎被質疑同外國勢力關係千絲萬縷，事有巧合，鬍鬚曾於今年初被踢爆同有多種身份嘅李實文密會三小時，據指李實文係鬍鬚曾首批劍擊徒弟，但李亦係漢奸黎嘅親友，多次被直擊進入漢奸黎位於何文田嘅寓所，再說，漢奸黎旗下報章雜誌多次吹噓鬍鬚曾所謂嘅高民望，鬍鬚曾、民主阿婆同漢奸黎三人錯綜複雜嘅關係，如果話一切都係咁啱得咁蹺，真係講都冇人信！
仲記得全國政協外事委員會副主任盧文端於選舉前數日喺報章撰文，列舉例證指鬍鬚曾已成為外部勢力同泛民選定為政治代理人及利益代表，再加上今次民主阿婆「言行合一」，除咗開腔撐之外，仲明碼實價捐錢畀鬍鬚曾，如果今次有人再想以花言巧語去撇清眾人嘅關係，似乎都係一廂情願嘞！