政情：卿姐 嫻姐話當年自爆被封惡女人

緬懷「八黨聯盟」合作

嫻姐話同卿姐雖然唔同黨派，但係一直都有偈傾，仲會互吐苦水，做議員時都覺得同卿姐可以就個別議題合作，佢又指自己Enjoy（享受）當年「八黨聯盟」，即多黨派就民生議題嘅合作方式，認為有助改善行政立法關係。卿姐立即和應，指嫻姐同田北俊當年最支持。雖然「八黨聯盟」已經係十幾年前嘅事，但自此之後就成為絕響，難怪係十幾年前嘅事，佢哋都記得咁清楚喇！

除咗「八黨聯盟」之外，卿姐又提到多件往事，話當年立法會開完會，嫻姐同一班泛民議員傾偈都被打小報告。嫻姐坦言知道，仲話當年反對長者生活津貼議案太快提交財委會，而被批評同泛民一唱一和。卿姐就覺得現時嘅立法會議員好多心魔，令議會對立，佢同嫻姐要合作都要搞掂泛民、建制同北京呢三座大山。

雖然已退下火線，但兩人仍好關心時政。嫻姐形容自己係打不死嘅曱甴，會努力約見特首候選人，促請佢哋對勞工政策作出承諾；至於卿姐就已經安排多個網台訪問，繼續跟進政壇情況。