政情：以色列旅警 黃定光淆底拒訪
立法會工商事務委員會尋日開會討論去以色列考察嘅安排，了解當地創新科技嘅發展。雖然港府正對以色列發出黃色旅遊警示，但大部分委員都表示支持到當地考察，唯獨該委員會前主席黃定光（象哥）就非常反對，話世界上有好多其他地區可以考察，「唔怕一萬、最怕萬一」，要求委員慎重考慮。
工商委會擬考察當地科技
工商事務委員會計劃今年七月應以色列領事館邀請，去當地考察七日，委員會認為以色列係一個人口同香港相若嘅小國，但已成功發展為舉世公認高科技及創新樞紐，值得參考。雖然政府當局向以色列發出黃色外遊警示，但資訊科技界議員莫乃光、該委員會主席胡志偉都認為黃色警示年頭到年尾都係，問題唔大，而以色列具參觀價值。
但象哥就對考察非常有保留，直言世界上有好多其他地區，「唔怕一萬最怕萬一」，擔心出事難以對香港市民交代，佢仲大爆自己出任委員會主席時曾經拒絕以色列領事館嘅邀請添，唔明點解件事放低咗又再拎起。其實，象哥唔想有危險，只要自己唔報名就得喇，若果有委員仍想去考察，就後果自負喇！