政情：小麗流年不利 寄望「桃花」報喜
今屆立法會有唔少新丁議員，其中一位議席「得而復失」嘅青年新政游蕙禎，本報去年初曾邀請香港術數家協會術數師楊子東批算佢嘅猴年運程，當時楊師傅曾指若游蕙禎嘅命格屬「正格」，將會「衰到無人有」，結果一語成讖。今年本報再找楊子東批算其他新丁議員嘅雞年運勢，包括容海恩、周浩鼎同劉小麗。其中被政府司法覆核議員資格嘅劉小麗流年不利，係吃力不討好嘅一年，但喺農曆四月有桃花運，莫非暗示單身嘅佢獲頒安慰獎？
容海恩冇霸氣要靠埋堆
劉小麗喺一九七六年出生，除咗雞年流年不利之外，特別係農曆三、七、八、十一及十二月運程較差，年尾更要小心健康，好彩「有大運幫佢」，亦會有貴人襄助，單身嘅佢農曆四月會有桃花運。劉小麗正面對議員資格司法覆核案，楊師傅稱劉小麗農曆五、六月運程較佳，如出現問題都可解決得到，但七、八月係對佢不利嘅月份，九月做事更容易徒勞無功。
至於喺一九七七年出生嘅容海恩係乙木命，從勢格，忌水木，四十歲後「個運長少少」，但雞年運程就一般，其中農曆二月、十月至十二月尤其不利，除咗要小心言論，十二月更要小心健康，喺交通上要留神，亦要小心被利器所傷。楊師傅話容海恩命格並唔適合從政，「講嘢唔叻」，亦「睇唔到霸氣」，只能「埋堆同其他人拍住上」，難以獨當一面。
周浩鼎易招「自己人」不滿
喺一九七九年出生嘅周浩鼎亦係乙木命，從勢格，與容海恩一樣都「一定要埋堆」先有運行。周浩鼎雞年嘅運勢尚算過得去，惟農曆二月將會「行衰運」，冬季即農曆十至十二月亦對其不利，易招「自己人」不滿，說話需要小心謹慎。
順帶一提，楊師傅批算以上議員，只係從八字中嘅年、月、日批算，因為難以得知議員嘅出生時辰，故批算或有偏差。不過講到尾，信則有，不信則無，大家當參考喇！