政情：覆核DQ「基金」過年加倍掠水
佔中發起人之一陳健民早前成立咗「守護公義基金」，為立法會議員梁國雄（長毛）、劉小麗、姚松炎同埋羅冠聰籌款，以支付早前政府司法覆核議員資格案件嘅律師費。基金成立初期，因騎劫元旦遊行而被質疑係掠水基金，目標為五百萬元，事隔接近一個月就話要加碼，仲獅子開大口話要逾千萬元添！
陳健民尋日喺香港眾志年宵攤位上解畫，話因為劉小麗、姚松炎同羅冠聰嘅法援申請被拒，所以希望嚟緊可以籌到逾千萬元畀律師費。同時，佢仲公布話依家暫時只籌得二百六十萬元左右，今年年宵佢哋就賣一包八塊嘅「DQ曲奇」，盛惠二百蚊一包，但只售五百包，埋單計數都只係得十萬蚊，距離目標仲係差好遠。
社民連賣咕（口臣）玩自嘲
另外，青年新政亦為其被取消議員資格嘅游蕙禎同梁頌恆籌款，以支付上訴至終審法院嘅費用，青政尋日傍晚喺社交網站宣布，早前被凍結嘅Paypal戶口已獲解封，可繼續作網上售貨用途，並可暫時作籌款用途，佢哋所準備嘅賀年產品，亦喺日內公布銷售方法。
過往都有喺維園擺年宵攤位嘅社民連，今年除咗有同政治議題相關嘅產品外，仲大玩「自嘲」。佢哋整咗名為「長毛牌」午餐肉罐頭外形嘅咕（口臣），唔通係想諷刺長毛早前嘅掟午餐肉案？