政情：年宵收益 「賣笑」楊岳橋 不敵眾志小鮮肉
一年一度嘅維園年宵上星期五完結，建制同民主派政黨都分別藉年宵籌款接觸街坊。其中公民黨（公文袋）今年就新增一個影相籌款項目，只需三十八蚊就可以同該黨人氣高企嘅黨魁楊岳橋合照，排場更勝一線明星。最終公文袋今年籌款加埋賣產品共收得三十五萬元，但仍然輸畀今年首次擺年宵已勁賺三十六萬元嘅香港眾志（眾志）。換言之，楊岳橋「賣笑」都不敵眾志小鮮肉呀！
民主派政黨擺檔有賺無蝕
民主派政黨喺年宵都有賺無蝕。公文袋話佢哋今年銷售額連籌款共得三十五萬元，淨收益約二十多萬元，特別為年宵製作嘅「紅綠燈」、T-Shirt、環保袋同電腦袋均全部售罄，估計大賺係因為市民希望同楊岳橋合照，間接帶旺人流。
至於首次擺年宵嘅眾志，雖然印有黨名嘅圍裙被內地廠房拒印，但喺呢班年輕人叫賣下，吸金力唔受影響。眾志話銷售額連籌款共得三十六萬元，而淨收益約二十二多萬元，暫時是吸金最強嘅政黨。至於社民連嘅銷售額就有二十八萬元，淨收益約十五萬元，而民主黨嘅總營業額逾十二萬元，由於租金成本上升，估計只有微利。