政情：熨斗大王倡睇病流程電子化
公立醫院急症室逢親假期就人滿為患，醫管局早前通過多項收費，其中急症室收費由一百元勁增至二百二十元，正待政府批准。身兼屯門醫院管治委員會委員嘅「熨斗大王」東保集團主席陳鑑光（Charles）認為，加價唔係一件壞事，不過如果可以參考內地醫院經驗，將成個睇病流程電子化，相信會大大縮短醫院人龍。
參觀惠州新醫院 大開眼界
Charles話，早前佢去惠州一間新醫院參觀，被佢哋嘅電子化流程嚇咗一跳，因為由預約時間、登記到攞籌排隊，都可以喺手機或電腦上操作。睇完醫生後可以自己打印藥方或X光片，若冇時間等攞藥，仲可以叫速遞公司送添！真係正。
Charles仲話，喺香港唔止去公立醫院睇病要等，就算私家醫院都要等，最攞命係等攞藥，等親都要等個幾鐘。早排佢朋友嘅小朋友夾親隻手，成塊指甲飛甩，去私家醫院睇都搞咗四個幾鐘，因為要等醫生、等手術室，乜都要等，似足最新施政報告及財政預算案公眾諮詢電視廣告旁白，真係好唔合理囉！