中環出更：鄭泳舜拍住拖 工展會辦年貨
尋日有唔少議員去維多利亞公園行工展會，包括立法會議員吳永嘉、周浩鼎（Holden）同油尖旺區議會主席葉傲冬等人。深水埗區議員鄭泳舜（Vincent）就拖實老婆胡可兒一齊去，Vincent自言平時工作忙碌，甚少時間同太太拍拖，所以尋日就實行「寓工作於娛樂」，帶埋太太一齊去，順便可以辦埋年貨添！
雖然話係辦年貨，但佢哋買得最多竟然係零食。Vincent話屋企零食消耗量特別大，早前由台灣買返嚟嘅鳳梨酥，佢一舊都未食過就已經無晒喇！佢家中有三個化骨龍，又難怪零食會「見光死」。唔怪得Vincent話要將留畀自己嘅零食收埋啲啦！
Holden買擺設氹太太
Holden雖然單拖到場，冇帶埋太太去，但都非常有心，買咗個極具聖誕氣氛嘅手造擺設送畀太太。佢話太太鍾意紅色，應該會鍾意份禮物。唔少人去工展會都會買廚具，但Holden就一件都無買，事關佢廚藝唔叻，所以廚具都係留番畀太太買咁話。
相比其他議員趁機掃貨、試食小食，葉傲冬就相對買得少嘢。佢話最近受黨友、立法會議員張國鈞減肥成功影響，佢亦開始減肥之旅，所以忍手唔買太多嘢食喇！佢依家一星期健身兩次，飲食方面亦都加以控制，唔食晚餐，而且食得較以前清淡，短短一個月已經減咗十磅。佢笑笑口話，太太承諾如果佢減肥成功，就會送相機畀佢，難怪減磅咁辛苦都頂落去喇！
卓妮