政情：CY棄連任 女兒首網上開腔 齊昕：邊度買貓屎咖啡
特首梁振英（CY）月初以家庭為理由宣布不尋求連任，而佢女兒梁齊昕嘅健康狀況就成為全城焦點。久未露面嘅齊昕尋日終於喺網上發貼，問網民喺香港邊度可以買到貓屎咖啡，仲附上開心表情。齊昕識得搵高級咖啡飲，睇嚟精神應該唔錯。
呢幾日CY上京述職，齊昕即打破近日沉默，喺facebook問網民：「香港邊度有得買貓屎咖啡」，又tag（標籤）咗自己做咖啡愛好者（coffeelover），並標註開心嘅心情。今次係CY宣布因家庭問題放棄尋求連任後，齊昕首次喺網上開腔，早前傳出佢因為內科問題入住沙田威爾斯親王醫院，而且情況嚴重。
未有回應網民熱烈反應
大批網民都非常關心齊昕，問佢係咪已經出院、身體有無好轉，亦有人話見到佢仲發貼，證明無事而安心。亦有人話貓屎咖啡製作方式唔人道，勸佢少啲飲；不過就有人質疑發文者係咪齊昕本人，雖然網民反應熱烈，惟齊昕統統無回覆。