政情：問責官唔得掂 拖累公務員
高官問責制推行咗十幾年，但係就屢受批評，唔少人都認為，近年表現麻麻嘅問責官員未有下台，未能體現問責制。尋日有機構發表一項民意調查結果，發現喺年輕人嘅觀感中，以十分為滿分，公務員與問責官員未能建立互信達到六點三一分，唔知係咪教育局局長吳克儉（吳得掂）等問責官員嘅表現太差，完全唔熟書，搞到公務員一鑊泡，所以年輕人都覺得兩者冇乜互信呢？
香港青年協會青年研究中心成立嘅「青年創研庫」喺上月一日至二十日以電話訪問咗五百多名青年，年齡介乎十八至三十九歲，喺公務員嘅挑戰方面，嚴重程度以十分為滿分，公務員隊伍承擔政治壓力嘅平均分達到六點七九分，公務員與問責官員未能建立互信方面，平均分達到六點三一分，除此以外，逾五成七受訪者認同，信任公務員多於政治問責官員。
吳得掂做乜衰乜
講真嗰句，喺現屆問責官員中，吳得掂幾乎做乜衰乜，好似國民教育同中史改革等政治事件，一直被批評愈解釋愈令人擔心，再加埋無啦啦又自爆每個月閱讀三十本書濕濕碎等，惹嚟公眾質疑睇乜嘢書，呢啲咪叫衰多口囉，就連嘈到拆天嘅小三全港性系統評估（TSA）事件，佢當時竟然去咗日本睇紅葉都唔出席立法會相關嘅公聽會，呢啲咁嘅表現都可能反映喺今次嘅調查結果，就係市民信公務員多過問責官員，公務員政治壓力大，而且未能與問責官員建立互信囉！睇怕公務員事務局局長張雲正都幾心煩，究竟要再做啲乜嘢先可以令公務員同啲問責官員磨合呢？
44％人想加入政府
另外，調查又發現受訪者對公務員喺「堅守法治」表現評分最高，平均分有六點一一分，其次就係「盡忠職守」及「廉潔守正」等，但青年對於公務員隊伍最大嘅印象頭三位，全部都係負面形容詞，分別係墨守成規、少做少錯及馬虎懶散，不過仍有四成四受訪者表示，如果有機會，希望成為公務員，最多人話因為薪酬福利合意，其餘就分別有約兩成認為係鐵飯碗及工作時間穩定。
青年對公務員嘅印象咁多負面形容詞，但係仲有咁多人想做公務員，唔知佢哋係想加入隊伍，改革公務員吖，定係因為依家經濟唔好，難搵薪酬福利好嘅工作，寧願加入公務員隊伍，一齊馬虎懶散下呢？