政情：基督宗派揀選委 抽籤烽煙四起
負責選出下屆特首嘅選舉委員會（選委會）選舉即將展開，而一千二百人嘅選委會委員之中，宗教界六大宗派各佔十人。基督教尋日就率先就選委進行咗首輪抽籤，喺五百多個候選人之中，分四組抽出最多四十人進入第二輪。由於唔少信徒都認為抽籤方法唔公平，場內場外都分別有人示威，烽煙四起。
抽籤場外有人灑溪錢
尋日抽籤由香港基督教協進會負責，抽籤未開始，一批基督教反圍標抽籤選委大聯盟成員就去到會場外請願，批評協進會以抽籤方式選出選委唔公平同唔合理，質疑大教會有人數嘅優勢可以做選委，又話係政教勾結。而抽籤時亦有人大灑溪錢抗議。由於宗派總會只係有三人提名，所以毋須抽籤，至於其他組別就各抽出十人，得出三十三人名單。下月中選舉管理委員會就會喺名單中抽出十人正式成為選委。
藍鴻震循天主教參選
除咗基督教，天主教嘅選委都係以抽籤選出嘅。身兼全國政協委員嘅前高官藍鴻震就話，唔會循政協嘅方式成為選委，反而會參與天主教嘅抽籤。至於另一個會參與天主教抽籤嘅就係身兼律師嘅法政匯思任建峰，佢話參選係要寸土必爭。