中環出更：工總將換屆 「宣」布唔上位
香港工業總會（工總）旗下嘅香港優質標誌局（Q嘜）早前舉行周年晚宴，工總主席鄭文聰、副主席林宣武等數百名業界翹楚濟濟一堂。林宣武早前獲政府委任生產力促進局主席，原本論資排輩，佢應該喺明年接任下屆工總主席，但佢笑笑口話唔接喇，因為佢已身兼香港付貨人委員會主席，又要打理自己生意，驚再做埋工總主席會兩頭唔到岸喎！
咁邊個上位接棒呢？林宣武就話，工總對此已有安排，唔通真命天子係排喺林宣武後面嘅副主席郭振華（Jimmy）？卓妮梗係第一時間搵Jimmy問清楚，Jimmy好直率話，如無意外而大家又支持嘅話，佢好樂意為業界服務，仲話自己已Ready喎！
蘇啟聲賣自家紙尿片獲獎
曾任深水埗區議會主席嘅Jimmy卸任區議員後，先後獲委任回收基金主席、勞顧會委員及標準工時委員會成員，睇嚟佢都頗有潛質成為工業界嘅新公職王。
同場仲有Q嘜主席丁煒章、副主席葉中賢、香港電器業協會理事長林偉明及秘書長丘榮豐等人，仁濟醫院前主席蘇陳偉香及丈夫蘇啟聲都有到場，事關佢哋自家品牌紙尿片獲得Q嘜人氣品牌大獎。蘇啟聲同台商合資喺越南及內地開鞋廠近三十年，員工多達十二萬人，生意上晒軌道，點解突然做紙尿片生意？
蘇啟聲笑笑口話，做開勞工密集嘅加工廠就知自動化生產有幾重要，加上尿片屬於快速消費品，喺內地市場好大，所以佢投資做埋全自動化生產紙尿片，係追上潮流。
卓妮