中環出更：遭的哥fb公審 林琳否認兼報警
尋日有人喺facebook（fb）群組「的士司機資訊網 Taxi」中發文兼上載圖片，分享前日接載一名態度奇差嘅乘客經歷。該名的士司機（的哥）公開咗嗰位乘客嘅電話號碼及相片，唔少網民發現乘客就係荃灣區議員林琳。林琳否認所有指控，仲話收到逾廿個電話滋擾，而的哥公開佢嘅上車地點，擔心住宅曝光而惹來騷擾，佢已報警處理，並打算向私隱專員公署投訴。
被指欺騙態度差
該名的哥指出，透過電話程式接到林琳嘅訂單，但批評當中存有欺騙成分，因為訂單顯示係由荃灣去沙田，而唔係去深井。的哥又形容林琳態度奇差，「當司機唔係人」，以時速七十至八十公里行車亦被投訴過慢，所以喺網上分享經歷以呼籲同業小心，以後見到呢個人嘅訂單時「最好就唔好接」。
林琳否認的哥嘅所有指控，更喺fb形容係「畀人屈事件」。林琳指出，用有關程式時從來冇輸入「沙田」，而係「深井」，而佢當時嘅態度亦唔係惡劣。至於投訴的哥行得慢，佢話當的士駛至迴旋處時，感到的哥只以時速廿至卅公里行駛先作出查詢，當中並冇嫌司機過慢，司機亦指出前面有交通警察，佢睇到後亦冇再追問喇。
卓妮