政情：識別有機黃煥忠：認住我簽名
香港人夠晒「錫身」，有機食品消費額每年都錄得雙位數增長。台北貿易中心日前首度舉行台灣有機農產品推介會，為打開香港市場探路。香港有機資源中心認證委員會主席黃煥忠都有到場，講起市面不時出現無機扮有機嘅情況，市民究竟點樣識別呢？黃煥忠笑笑口話，產品包裝如果貼有標籤基本上就信得過，至於冇包裝嘅新鮮蔬果，認住有佢簽名嘅有機認證標籤就得喇！
盛讚台灣農業
黃煥忠話香港現時只得兩間有機食品認證機構，其中八、九成由佢哋認證。香港對有機食品嘅需求好大，預計今年銷售額可達六十八億元。不過有機食品多數由外地入口，其中又以大陸為主，但係大陸有機食品係咪真有機就令人憂慮。
佢對台灣嘅有機農業都頗有研究，形容其發展喺亞洲處於領先地位，標準仲嚴格過香港，多年來，唔少台灣嘅大學老師仲特登飛過來教本地農民添！