政情：頭炮唔講「獨」兩派各有盤算
新一屆立法會將於本周三（十二日）宣誓就職，下周三（十九日）舉行首次正式大會，會上兩項無法律效力嘅動議辯論名額，分別畀工聯會黃國健同民建聯張國鈞抽到，令人關注兩人會否提出「反拉布」、「反港獨」等政治性嘅動議議題，為建制派喺新一屆議會打響頭炮。不過，兩人最後分別選擇提出撤銷強積金對沖同中史科改革等非政治議案，究竟佢哋背後有咩考量呢？
港獨思潮喺香港不斷蔓延，十一當日就有多間大專院校校園湧現多幅「香港獨立」大型直幡，亦有多間中學成立咗本土關注組，有學生喺校園內外派發港獨宣傳品，照計一眾忠貞愛國嘅建制派議員理應好激憤，冇理由唔趁新一屆立法會開鑼做番啲嘢。
免梁君彥作爭議裁決
據了解，確實有位建制派新丁提出過一個有關反對港獨嘅動議，但一曝光就畀啲盟友撳住，原因係大部分建制派都唔想今屆議會一開波就打仗，認為點都要「做吓樣」，製造與非建制陣營和諧合作嘅氣氛。
再者一旦建制派提出反港獨動議，非建制一定會加插多項撐本土、撐自決、甚至公然撐港獨嘅修訂，屆時只會玩殘已篤定當選新一屆立法會主席嘅梁君彥（Andrew）。屆時佢批准有關修訂又死，唔批就仲死，即係玩埋自己友。不如等Andrew做番幾個月，主持會議熟晒手之後，先至要佢作出呢啲咁困難同爭議性嘅裁決。
議案或左右特首選情
非建制陣營方面，據悉亦有人諗過提出有關香港前途、本土自決、以至明刀明槍支持港獨嘅動議，但同樣因為種種理由而暫時擱置。其中一個考量係特首選戰即將開打，阿爺會支持邊個參選仍然未明朗，非建制喺呢個時候提出港獨動議，可能會變相益咗某啲想選特首嘅建制派人士，為對方提供選舉議題同埋爭取阿爺支持嘅藉口。
另一考量係，非建制今屆新丁較多，泛民方面有多名資深議員退休或落選，本土派更係清一色新人，唔熟悉議會規則同程序，部分人更可能連發言辯論都有困難，對住資深議員較多嘅建制派會好蝕底。橫掂呢場港獨VS反港獨嘅硬仗，喺今屆立法會遲早都會打得成，遲打好過早打，不如就過埋特首選舉先算。