政情：單身陳淑莊遊南美有艷遇
今屆立法會有唔少單身女議員，包括兩名「四十五歲關注組」成員公民黨陳淑莊(Tanya)同工聯會麥美娟，仲有啱啱踏入四字頭嘅劉小麗、三字頭嘅新民黨容海恩同九十後嘅青年新政游蕙禎，佢哋嘅感情生活備受關注。其中Tanya喺當選後就隻身去咗南美旅行，但佢似乎一啲都唔寂寞，臨走前仲有「艷遇」添！
型男畫家送禮兼合照
話說Tanya喺南美之旅尾站阿根廷嘅伊瓜蘇，去咗一個名為Feria de Mataderos嘅市集流連，一邊飲啤酒，一邊欣賞當地人嘅地道歌舞表演。當中最印象深刻嘅，就係有位型男一邊播住勁歌，一邊用噴漆畫畫，最後仲畀Tanya抽籤抽中頭獎，可以任揀佢其中一幅傑作。咁好彩，擺明係嗰位型男畫家暗中做咗手腳喇！
Tanya之後仲同嗰位型男畫家及佢揀咗嗰幅畫合照，相中見到型男影到伸晒脷，好似好high咁，可見Tanya嘅魅力。Tanya計劃裱起幅畫再掛喺立法會辦公室，以便將來開會拉布時可以睹物思人，諗番喺南美時嘅開心經歷。