喺名著《動物農莊》裏面，有啲動物比其他動物更平等，今時今日香港都係一樣，竊鈎者誅，竊國者侯，所謂「法治之區」，講吓笑就得。
大家應該記得，前年有三名男子因為不忿壹傳媒老闆淫賤黎旗下報章日日鼓吹非法佔領行動，佢本人又喺金鐘嘅「私家皇座」充任總指揮，將香港搞到烏煙瘴氣，憤而向佢投擲豬內臟。呢三位仁兄日前被判襲擊罪成，分分鐘監都有得坐。
啲政棍成日話「違法達義」，眼前就係現成例子嘞。講真，如果唔係港府對佔領搞手束手無策，使乜小市民自己企出嚟替天行道吖。有人話如果係換轉喺古代，呢班以武犯禁嘅義士，絕對堪稱懲兇安良嘅俠客，唔係冇道理o架。最令人無奈嘅係，小市民涉嫌犯法就要拉要鎖，判決從快從嚴，反觀作為佔中金主嘅淫賤黎卻至今逍遙法外，你話係咪荒謬吖！
話時話，除咗策劃佔領呢一筆，淫賤黎向泛民秘密捐款醜聞被本報揭發至今亦接近兩年，廉記開頭係威係勢，甚至高調上門搜證添，可惜之後石沉大海，無晒下文。對於港府姑息養奸，市民已經忍無可忍，「東方報業民意調查」顯示，大部分受訪者認為應該盡快將淫賤黎繩之於法，唔少人則批評當局有法不執，最終只會助長違法行為。
冇錯嘞，民不服吾能而服吾公，港產官僚顢頇無能，施政本來就一塌糊塗，加上司法不公，民望唔低殘至奇！大家有眼見，佔領過後當局一直唔敢拉帶頭嘅政客，敢拉又唔敢告，即使告到法庭嘅都只係蝦兵蟹將。港府欺軟怕硬，捉小放大，唔止市民睇唔過眼，連搞手本身都忍唔住對港府冷嘲熱諷，問你服未。至於黑金醜聞仲離譜，明明捐嗰個同收嗰個都唔敢否認，點解當局到依家仲係拖拖拉拉？唔通真係好似有啲人咁講，怕咗喺背後撐腰嘅外國勢力，所以投鼠忌器？
百年養不足，一日毀有餘。經過佔領之亂以及黑金醜聞，加上近年多名前高官捲入貪腐醜聞，特別係有貪湯之稱嘅前廉政專員湯顯明遭放生，香港辛辛苦苦建立嘅廉潔同法治形象，幾乎一鋪清袋。美國傳統基金會以及國際反貪組織發表報告，香港喺廉潔方面嘅得分雙雙下跌，依家知點解喇。正如上述民調顯示，大部分受訪者話如果黑金事件最終不了了之，將大大損害本港法治精神，廉潔形象亦將一去不復返。
所以話，天作孽，猶可恕；自作孽，不可活。法治同廉潔係香港成功嘅基石，港府帶頭破壞，等於搬石頭砸自己嘅腳，同自殺冇咩分別嘅咋！