中環出更：北上嗌「小姐」 楊釗鬧笑話
俗稱「中港大戰」嘅中國足球隊及香港足球隊嘅比賽○比○和氣收場，事後卻爆出港隊門將葉鴻輝聲稱被國足隊隊長鄭智辱罵為「狗」嘅風波，由此引申港人嘅普通話水平嘅討論。咪以為政商界人士不時穿梭中港兩地，無論講同聽普通話都得心應手，其實都試過因中港文化不同，出現唔少尷尬場面。好似中華總商會會長楊釗，以前到內地酒樓或酒店時稱呼女侍應為「小姐」，事後先知「小姐」呢個稱呼，會令人誤會係從事色情事業嘅女士。
中華總商會尋日舉行周年會員大會，中港大戰後爆嘅出辱罵風波仍然係討論話題之一，其中篤信佛教嘅楊釗語重心長話，多個朋友總好過多個敵人，加上中港兩地或多或少有文化差異，言語上嘅誤會有時難以避免，因此毋須介意太多或太上心。佢其後更不惜以自己為例子，自爆過去冇乜特別留意個別內地用語，要其他人近年提醒先知悉並注意。
曾智明食鯇丸湯寓「搵人劏」
涉及普通話或家鄉話嘅笑話同尷尬場面真係十常八九，同場嘅中總副會長曾智明形容，普通話有好多不同嘅口音，好多時都會有類似笑話出現，好似佢哋客家人好鍾意食俗稱「鯇丸湯」嘅鯇魚丸湯，用客家話講嘅讀音就好似廣東話「搵人劏」，所以有時佢同朋友打麻雀時，食鯇丸湯就會笑住話要「搵人劏、搵人劏」！
同場出席會員大會嘅仲有中總常務會董方文雄、選任會董蔡關穎琴、陳光明及張俊勇等人。
講開人民幣最近貶值，本身有投資內地生意嘅陳光明相信，如果於內地賺錢後並喺當地使用，相信影響不大，除非要兌換成其他貨幣。
卓妮