政情:地政署爆冷獲申訴署嘉許

地政總署可以話係申訴專員公署嘅常客,不時被指批地後無做好監管工作,又經常出現非法霸佔官地。不過,尋日「2013年申訴專員公營機構嘉許獎」中竟然「爆冷」,地政總署有份獲頒嘉許獎,就連地政總署署長甯漢豪都感到驚訝,仲用「驚喜交集、愛恨交纏」形容平時排山倒海嘅工作,但每當見到工作有所改善時都會好開心。

年收二百宗轉介 署長閉翳

今年嘅公營機構嘉許獎,渠務署、路政署及地政總署都係得獎機構之一,而且仲係首次獲獎。不過,最大驚喜嘅相信係地政總署,事關該署每年都收到成二百宗轉介,真係慢啲手腳都唔得,今次就表揚佢哋開展服務嘅新措施,以及研究處理非法使用政府土地嘅法定權力限制。

甯漢豪上台領獎時都話好驚訝,仲透露曾向申訴專員黎年大呻,話收到咁多轉介好閉翳,但專員叫佢唔使驚,因為佢哋唔係收最多投訴嘅公營機構喎,原來一山還有一山高,咁邊個公營機構係最多投訴嘅呢?

第一手消息請下載on.cc東網iPhone/iPad/Android/Windows Phone Apps