中環出更：泰爆炸案傷者擬硬撼阿王
泰國曼谷爆炸案嘅港人傷者早前全部返港，而且陸續康復中。政圈消息指，事件其中一名傷者、柴灣區街坊福利會理事長朱日安擬參選東區區議會小西灣選區，硬撼擬於年底於當區參選嘅現任立法會議員王國興（阿王）。朱日安接受查詢時對是否參選不置可否，強調目前最重要係做好地區服務，否則「人哋唔需要你都冇用」；另一名事件主角阿王亦對是否出戰區選不作評論，但言談間暗撐當區續由工聯會中人任議員，直指現任區議員陳靄群服務多年，一向得到當區市民支持。
阿王鋪路戰超級無咁易
事實上，阿王擬落戶小西灣選區於政圈已經係公開秘密，旨在為明年由香港島地方直選轉戰俗稱「超級區議會」嘅區議會第二功能界別議席鋪路，但阿王未必可以好似陳靄群咁，於今屆區選喺無對手下自動當選。
地區消息指，朱日安過去一年多頻頻於當區舉辦各類型活動，包括七月底於鉛水事件爆出後，喺社交網站上載有其肖像嘅單張，要求政府盡快安排專業人士去小西灣村拎水辦驗水。由此觀之，除非有關方面可於最後關頭協調或勸退其中一方，否則朱日安於區選硬撼阿王似乎在所難免。
卓妮