公立醫院與醫療事故已成為孖生兄弟；甚麼打錯針、輸錯血、斷錯症、用錯藥、開錯刀……總之烏龍百出，就如黃泥跌在茅坑裏——不是死（屎）來也是死（屎）！
公立醫院睇病，醫你唔死算你夠運；以前啲人話啲黃綠醫生斷症一味靠估，反正說錯了病原，總比說不出病原令看病的人，奉獻診金時覺得沒有白給；你發燒嘛，大抵是火旺燥熱、咳嗽是「風寒」、有痰就是「肺熱」、腰疼嘛？大抵是「腎虧」，若結婚了，就要注意減少行房，未婚的大哥，少點自慰，大抵「腎虧」三個月就可改善！
阿哥，切不要笑，你不幸遇着庸醫，切了丁點心肝脾肺腎，就當成激勵：天將降大任於斯人也！這總比走入公立醫院幸運，因為很多時，你右腳有事要做手術，分分鐘變成左腳沒有了，而右腳依然有事，又分分鐘變成兩隻腳都沒有了！當然，如果你是天生樂觀者，大抵可以慶幸，還不至於人入住了公立醫院，一隻腳已經伸進了棺木！
老朽之所以有如此感慨，皆因「公立醫院」四字令病人不安，它第一時間叫人聯想起一件接一件、一件比一件更離奇嘅醫療事故！
最近東區醫院把一名六十多歲的男病人誤診為肺癌，病人被切除了四分之一肺葉後，院方才發現，病人只是肺癆而非肺癌，斷錯症切錯肺後，院方雖致歉又諸多解釋，又強調係個別個案，將成立調查委員會徹查……
九萬幾樣嘢事後「補鑊」，然而，病人除了捱刀承受不必要嘅痛苦，最慘嘅係醫院一個又一個調查報告，可憐病人嘅健康就咁在冷硬嘅報告裏陪葬！
整個公營醫療系統千瘡百孔，亂象叢生，尤其是肥上瘦下嘅政策，更令前線員工人手長期不足，唔出事故就真係狼群裏跑出羊來了——不可能！