台灣成人博覽會 情色‧生活‧大雜燴

如果話成人博覽會多嘢睇都算,只係話佢好多嘢玩,真係講都冇人信。須知道不論美國、日本定澳門嘅成人博覽會,佢哋都係以表演同睇騷為主,究竟呢個啱啱喺21號舉辦,為期4天嘅台灣成人博覽會,點樣將情色、生活同嘉年華融為一體呢?

演繹情色

自2011年首次舉辦嘅台灣成人博覽會,隨住時間推移愈嚟愈受台灣大眾注目,因此小記訪問咗主辦單位,博展國際有限公司總經理陳中美先生。他表示成人博覽會嘅目的,並非僅作為一個商品銷售平台,更重要係喚起大家對性生活嘅重視,正面看待兩性關係之餘,更希望成為台灣嘅成人嘉年華。

為貫徹呢個目的,今年大會不但請嚟沖田杏梨、千乃杏美、彩乃奈奈、AIKA同葉月美音5位人氣日本女優,應邀日本AV片商TMA更加碼搵嚟號稱「波多野結衣最強對手」嘅上原亞衣,及近年積極喺亞洲發展兼粉絲勁多嘅水菜麗,合共7位代言女優登場。難怪小記開幕當日到場,發現雖然距正式開放時間仲有成兩粒鐘,就已經有超過50名粉絲準備入場,等住喺開幕儀式上同佢哋嚟個近距離接觸。

玩味柔情

女優固然係今年成人博覽會嘅重頭戲,只係大家想知道當日玩得有幾咁勁同香艷,就要留意小記日後嘅後續報道。不過講到明係嘉年華,會場又點只得7位女優坐鎮咁冷清呢?大會安排咗超過20位Show Girl,以性感扮相穿梭現場,不但供與會人士同佢哋影相,更順便進行拉票,等佢能夠成為博覽會中人氣SG王者!

不過齋影佢哋或者嚟個Selfie又點夠嘅呢?最好梗係可以同佢哋玩埋遊戲啦!雖然大會現場設有多個遊戲區,分別有雷射手槍射公仔、荔園式拋藤圈、掉膠波等,但老實講,入親場嘅都肯定係18歲或以上,會唔會無聊咗啲呢?小記咁諗,現場亦有唔少人都係咁諗,只係唔知點解排隊玩嘅人依然絡繹不絕,惟有講番句橋真係唔怕舊。當然,如果遊戲可以刺激啲,相信氣氛會更加熱烈。

香艷表演

作為推廣性文化嘅博覽會,當然唔少得促進兩性關係,及床笫之間樂趣嘅情趣用品啦!不過講到呢方面,卻及唔上會場內各類由一眾SG擔當嘅極香艷表演項目,當中分別有名為「畫眉之樂」嘅人體彩繪、「我愛泡泡」嘅香艷出浴騷、令男士都為之蠢蠢欲動嘅攝影環節「電車癡漢」等。每位SG都以超性感嘅造型登場,因而令到每個表演場地未到演出時間,四周已圍滿大量人士。

係咪代表冇辦法霸到靚位?咁又未必!事關每個場地嘅演出時間都唔一樣,大家入去前先行刨熟大會喺門口派發嘅時間表,就能夠搵到最佳入場時間。問題係,大家未必會有時間刨時間表。皆因現場活動及演出相當多,唯一嘅辦法就係等到下晝,其他入場者已經攰透或去食午飯,就可以攝到靚嘅影相位嘞。

鐵絲點睇?

華仔同埋好友中美混血兒小艾均嚟足四屆博覽會,絕對係名副其實嘅鐵桿粉絲!唔知佢哋點睇今年嘅博覽會呢?華仔表示:「今年嘅會場大咗又光猛咗,環境較以前嚟得舒服。」小艾呢個時候搶道:「我哋嚟都係為咗睇AV女優,因為去屆有波多野結衣,今屆則有佢嘅勁敵沖田杏梨。」華仔笑道:「其實我都係鍾意波多野結衣多啲,而今次嚟到嘅水菜麗同埋上原亞衣都相當唔錯,因為我平時都有『留意』開佢哋。」

後記

心水清嘅朋友會留意到,既然2011年係首屆,今年應該係第五屆,唔通小記寫錯咗?非也,皆因去年主辦單位因場地問題而停辦一年。幸好今年終於搵到世貿三館呢個交通相當方便嘅靚位,總經理陳先生表示希望翌年能繼續喺度舉辦,等呢個台灣成人界盛事成為一個每年一度嘅慶典。

直擊睇片

網址:http://hk.on.cc/hk/bkn/cnt/lifestyle/20150822/bkn-20150822121918417-0822_00982_001.html

第四屆台灣成人博覽會

日期:即日至8月24日

網址:paulchan.com.tw/adultexpo/

特派記者:魂