建制派立法會議員WhatsApp群組對話一連兩日曝光，尋日講到工聯會陳婉嫻（嫻姐）於政改表決前喺群組內話：「請冷靜！不要令我們被動」，仲喺句子後面加咗太陽花、烏龜及笑臉圖案。
究竟三個圖案代表咩，大家都相當有興趣，更加有人估計，三個圖案其實係指「黃花龜（閨）女」添！嫻姐就解釋，呢三個圖案係佢常用嘅表情符號，代表唔同意思，太陽花係佢最鍾意嘅圖案，烏龜代表祥和，而笑臉圖案則係代表佢自己喎。
不過，呢三個圖案幾次出現都有唔同嘅組合，莫非仲代表其他暗號嘅？
