中環出更：網上交表派錢快 政府如夢初醒
政府喺前年推出「關愛共享計劃」向合資格市民派錢，但就惹來廣泛批評，指實體申請表格欠效率，不單止拖慢當局處理申請嘅速度，更有申請人所遞交嘅表格被遺失或遺留處理。事隔兩年，政府因應疫情向受影響行業發放資助，有官員表示，發覺透過網上遞交申請，好快就可以派到錢！
議員斥部門各自為政
立法會會議尋日討論新一輪紓困措施，議員容海恩提到喺上一輪措施當中，好多政府部門各自為政，例如有部門要求先下載應用程式，亦有部門採用網站，希望政府能推出一站式平台幫助唔同行業申請，同時加快效率。
當局話，如果有中央統籌就會費時失事，所以依家百花齊放反而更加快。佢又話政府其實已經千方百計諗盡便捷方法，仲以當局向零售業發放援助嘅方式為例，指依家唔用紙、全部用網上申請，發覺效率真係快咗，短短三星期就收到九萬幾份申請，仲可以一邊開放申請、一邊畀錢，更喺短短四個星期內發放過萬筆款項添！之但係，若然政府喺兩年前識得善用科技嘅話，就唔會搞到市民當時咁不滿喇！
卓妮