「縮水版」七一慶祝活動，除咗文化中心廣場嘅啟動禮，港島區重頭戲都刻意避開民陣遊行地點，改為柴灣公園舉行，而九龍、新界區就選址旺角同沙田。往年慶祝只係曇花一現，但委員會今年唔想再靠敲鑼打鼓、興高采烈咁堆人頭，而係想深入細節及民心。唔通愛國活動都要學泛民「遍地開花」？
另一邊廂，民陣宣布行政署拒絕七一遊行以「公民廣場」政府總部東翼前地為終點，但仍然以十萬人為目標。不過，睇番佢哋上星期嘅滾動式集會加埋都係幾千人；加上遊行以「修改《基本法》」為副題，但民主黨等泛民政團都表明有異議，所以民陣要谷到十萬人遊行可能要靠場外點票至得喇！