飲食業難請人已經維持好一段時間，最低工資委員會委員黃傑龍（Simon）尋日喺社交網站上載一張批准員工放生日假嘅表格，相信打工仔都好羨慕。Simon話，早前佢與公司一班主管開會，商討有咩方法可以令員工開心啲，大家諗到不如放一日「生日假」同一日「義工假」，並於今年初實施。結果員工真係開心啲，對公司有歸屬感，咁流失率自然低啲喇！
佢話做飲食業大時大節要返工，放生日假對運作影響不大，而畀員工放屬於自己嘅假期都幾窩心。咁二月廿九日生日嘅員工咪四年先可放一次生日假？佢笑言只要喺生日月份攞假就得喇！Simon咁有誠意做良心僱主，但講到勞工界爭取多年將勞工假同公眾假期睇齊，佢就話一刀切做法可能令小店更難經營，有能力嘅食肆就可以做多啲，最好彈性處理喎！