政情：唔敢單獨見官 泛民心虛
政改去到生死存亡嘅關頭，特首梁振英（CY）同政務司司長林鄭月娥除咗早前去深圳見大部分立法會議員之外，返到香港仲逐個逐個咁會見，似乎想逐票逐票撬番嚟。尋日率先會見嘅係怪醫梁家騮，公民黨四位議員就一齊見。不過公專聯嘅莫乃光、街工梁耀忠都唔肯單獨見官員，莫非佢哋身有屎，驚私下會面有手尾？
據悉，政府已放棄拉攏民主黨整個「票倉」，反而諗住好似上次政改咁，採取「逐個擊破」嘅策略，撬得四、五票，政改夠票通過，咁就大功告成。最近有關方面開始約見議員，莫乃光自爆，早幾日政府約佢單獨見面，但被佢拒絕，事關佢唔想私下約談後，事後有乜不利傳言就跳落黃河都洗唔清。結果政府好快就安排佢孖住同樣係公專聯嘅梁繼昌一齊見。
傳「死硬派」還擊溫和派
除咗莫乃光，原本獲邀單獨見面嘅梁耀忠，都話要同工黨一齊去。民主黨同公民黨就好齊心，話政府想傾就要黨內幾個議員一齊去。至於夠薑單刀赴會嘅只有個別泛民，例如馮檢基及李國麟。
泛民咁驚青做乜？政界一直流傳，有關方面為咗游說泛民議員轉軚支持政改，開價一億元買一票。又有傳言話，上一次傾政改方案，時任特首嘅「貪曾」曾蔭權爵士喺單獨見泛民時，揪出黑材料要挾泛民轉軚。觀乎近日泛民議員嘅反應，睇嚟呢啲消息並非空穴來風。泛民今次點都要行孖咇去傾政改，都係費事煩。我哋仲聽聞，有「死硬派」泛民打算以「玩踢爆」還擊，令溫和派泛民唔敢與CY單獨會面。
梁家騮一支公赴會唔轉軚
講真嗰句，如果泛民唔係「身有屎」，又點會咁心虛，怕畀人踢爆黑材料吖！正所謂君子坦蕩蕩，如果不做虧心事，又使乜怕單獨傾政改喎！梁家騮咪又係一支公走去見CY，然後抬頭挺胸話，都係會堅決否決政改。