林志堅登山 度士憶憾事

德甲港將林志堅在港行程緊密,但佢仍心繫足球,除咗吃喝玩樂,仲想了解一下香港足球情況,繼早前拜訪賽馬會傑志中心後,又踩入名將雲集的車路士足球學校(香港),拜見土產「世紀球星」山度士,又同一班小將踢練習賽。兩代港產名將礙於言語不通,只能作有限交流,但林志堅的到訪,竟勾起咗「山Sir」當年一段憾事嘅回憶。

因傷錯過赴歐發展

林志堅大駕光臨,作為東道主嘅山度士當然要熱情款待,佢先安排志堅帶領小將們熱身,然後開波踢分隊賽,山Sir更與林志堅編埋同一隊,兩人打One Two絲絲入扣,見到林志堅,「度士」不禁記起自己當年錯失赴歐落班嘅憾事,感慨萬千。

原來早前歐陽耀冲喺葡甲登場,成為繼張子岱之後,53年來首位在歐洲征戰的港人成為焦點體育新聞,但其實山度士早於92年亦曾有機會赴歐發展,當年佢代表港隊出戰香港主辦嘅世界盃5人賽,港隊由比利時教練靴文斯領軍,賽事結束後靴文斯認為山度士有到歐洲落班嘅實力,更有意帶佢去比利時發展,當時甚至連轉會安排亦已傾妥咁滯,可惜其後山度士不幸受傷,結果未能成行,轉會計劃最終亦不了了之。山度士諗番起呢件往事,到依家仲耿耿於懷。

為下一代播下種子

講到林志堅,山度士認為佢都算係半個香港人,而佢能夠在德甲落班並甚至試過正選落場實在好厲害:「莫講話有機會落場,能夠獲球會賞識簽約加盟,已經係好了不起。當年我因為受傷未能到比利時搵食,實在好遺憾,希望我嘅歐洲足球夢,他日可以有學員能夠實現。」

對於林志堅今次嚟探班,又同一班小將切磋,山度士表示感激:「佢嚟呢度對一班小將起到激勵作用,佢向佢哋播下向外闖嘅種子,唔好話去到德國呢啲足球水平咁高嘅國家啦,如果我嘅學員可以去到中超或日本落班,已經係好高嘅成就。」