政情：有相為證：荔園懷舊邀請卡 玩味十足

充滿港人集體回憶嘅荔園將於本月下旬喺中環海濱重開，已故荔園創辦人邱德根兒子、現任荔園主席邱達根就大玩懷舊feel，就連邀請傳媒出席開幕典禮嘅貴賓邀請卡亦別具一格，卡面驟眼望落似足童年時嘅黃色生字簿，上面有象徵荔園嘅標誌「老虎仔」，打開張卡就係正常嘅邀請函內容。隨函同時附有一盒康樂棋，棋盤紙上逐一介紹荔園內嘅熱門景點，包括吸蕉大笨象、滑稽恐龍屋及經典掟階磚等，真係睇見都想玩。