政情：區議員幫手覓投票站場地
每逢區議會選舉前夕，政府相關部門都會就投票站位置諮詢各區議會意見，如果有學校拒絕借出地方供市民投票，就要更改投票站位置，好似觀塘區內，就有做開投票站嘅小學唔肯借出場地。觀塘區議員洪錦鉉話，呢間小學解釋話校方冇人手睇住票站，所以唔肯借。原本搵地方做投票站係政府嘅責任，但洪錦鉉就好上心，竟然幫手四出搵場地，最終搵到幼稚園做投票站。
洪錦鉉嘅選區位於寶達，佢話最初打入呢個社區一啲都唔容易，仲曾經「畀人圍」。由於洪錦鉉同細佬太似樣，搞到細佬成為被圍對象，之後有一段時間都唔敢再落區幫佢手做嘢添。
不過，經歷咗幾年嘅深耕，洪錦鉉依家同街坊嘅關係非常好，仲經常互邀對方出席活動。佢話最緊要同街坊互相尊重，見面時要叫得出對方嘅名，再加埋九十度鞠躬，對方自然感受到佢嘅誠意喎。